Тожикистон – Россия ўйинидан фрагмент. championat.com сайти фотосурати
17 ноябрь куни Душанбеда бўлиб ўтган ўртоқлик учрашувида Тожикистон ва Россия терма жамоалари 0:0 ҳисобида дуранг ўйнади.
Биринчи бўлим россияликларнинг устунлигида ўтди, улар кўпроқ ҳужумга ўтишга ҳаракат қилишди, бироқ уларга охирги пас етишмади. Ҳужумчиларга узоқ тўплар бериш ҳеч қандай фойда келтирмади. Тожикистонликлар эса кўпроқ ҳимояланишди, қарши ҳужумга таянишди ва ҳатто дарвозага зарба беришга ҳам ҳаракат қилишди. Хуллас, Александр Селихов дарвозасининг узоқ бурчагига Эҳсон Панжшанбе томонидан тепган тўп ҳимоячидан қайтди ва бурчак билан якунланди.
Иккинчи бўлимда ўйин бироз очилди. Тожиклар очиқроқ олдинга боришди, руслар дарвозасига тез-тез таҳдид қила бошладилар. Ўша Панжшанбе хавфли зарба йўллади, аммо руслар дарвозабони ишончли бўлиб чиқди. Бироқ россиялик футболчилар барибир ғалабага яқинроқ эдилар. 85-дақиқада Даниил Уткин бурчак тўпидан сўнг тўпни Рустам Ятимов дарвозасига йўллади, бироқ ўзбекистонлик ҳакам Илгиз Танташев голни бекор қилди.
Тожикистон ва Россия терма жамоалари илк бор ўзаро ўйин олиб бордилар.
Эслатиб ўтамиз, Россия терма жамоаси Марказий Осиёга экспериментал таркибда келган. Хуллас, Тожикистонга қарши ўйинда асосий таркибда бирданига тўрт нафар дебютант майдонга тушди.
Россия терма жамоаси Душанбедан сўнг Тошкентга йўл олади ва у ерда 20 ноябрь куни «Пахтакор» стадионида Ўзбекистон терма жамоаси билан ўйнайди.
Украинада РФ МҲО бошлангандан сўнг ФИФА ва УEФА томонидан Россия футболига нисбатан қўйган санкцияларга кўра, Россиянинг барча клублари ва жамоалари, жумладан, аёллар ва ёшлар ҳам барча расмий мусобақаларда иштирок этишдан четлатилди. Дунёдаги баъзи футбол жамоалари ўртоқлик ўйинлари ҳали санкцияларга дуч келмаса-да, русларга қарши майдонга тушишни принципиал жиҳатдан рад этишмоқда.
