www.gov.kz сайти фотосурати
Қозоғистон президенти Қосим-Жомарт Тўқаев «Республика Ҳарбий доктринасига ўзгартиришлар киритиш тўғрисида»ги фармонни имзолади. Бу ҳақда 24 октябрь куни мамлакат Мудофаа вазирлиги матбуот хизмати маълум қилди.
«Ҳужжат ҳарбий-сиёсий ва ҳарбий-стратегик соҳалардаги фаолиятнинг янги йўналишларини, ҳарбий соҳадаги норматив-ҳуқуқий ҳужжатларни тизимлаштириш ва ҳарбий режалаштириш тизимини жорий этиш чора-тадбирларини ўз ичига олади», — дейилади хабарда.
Бундан ташқари, янгиланган доктринада Махсус операциялар кучларини ривожлантириш ва уларнинг бошқа давлат органларининг махсус кучлари бўлинмалари билан ўзаро ҳамкорлигини кенгайтириш кўзда тутилган.
Ҳарбий доктринанинг янги таҳрири давлатнинг ҳарбий хавфсизлик ва мудофаани таъминлаш борасидаги қарашларини замонавий талаб ва шароитларга мослаштириш имконини беради, шунингдек, янги таҳдид ва хавфларга муносиб жавоб бериш учун мамлакат ҳарбий салоҳиятини оширади, деб таъкидлайди Мудофаа вазирлиги.
Ҳужжатнинг ўзи 12 октябрь куни эълон қилинган.
У, жумладан, қўшинларда ахборот-психологик ва дастурий-техник (кибер) таъсирларга қарши курашиш бўлинмаларини яратишни, шунингдек, Қуролли Кучлар таркибида ҳудудий мудофаа қўмондонлик ва бошқарув органини ташкил этишни назарда тутади.
Доктринада таъкидланишича, Қозоғистон ҳеч бир давлатни душман деб ҳисобламайди. Мавжуд вазият таҳлилига бағишланган бўлимда айтилишича, дунёдаги ҳарбий-сиёсий вазият юқори динамизм ва ривожланишнинг олдиндан айтиб бўлмаслиги, таъсир доиралари учун жаҳон ва минтақавий кучлар ўртасидаги қарама-қаршиликнинг кучайиши, шунингдек давлатлараро ва давлатлар ичидаги қарама-қаршиликларни ҳал қилишда ҳарбий кучларнинг роли ортиб бораётгани билан ажралиб туради.
Янгиланган ҳужжатда Қозоғистон хавфсизлигига таҳдид соладиган асосий таҳдидлар қаторида «дунёда оммавий қирғин қуроллари ҳажмининг кўпайиши, шунингдек, янги жисмоний тамойилларга асосланган оммавий таъсир қилувчи қуролларнинг яратилиши» санаб ўтилган. Республиканинг ҳарбий-сиёсий соҳадаги фаолиятининг асосий йўналишлари тўғрисидаги банд эса «Глобал ва минтақавий хавфсизлик тизимини такомиллаштириш мақсадида бошқа давлатлар ва халқаро ташкилотлар билан ҳамкорликни мустаҳкамлаш» тўғрисидаги низом билан тўлдирилди.
Бундан ташқари, янгиланган ҳужжатда Қозоғистоннинг тинчликпарварлик фаолияти билан боғлиқ чора-тадбирлар рўйхати кенгайтирилган.
