«Ҳумо» хоккейчилари. «Ҳумо» матбуот хизмати фотосурати
Тошкентнинг «Ҳумо» жамоаси Қозоғистон чемпионатининг чорак финал плей-офф босқичида Руднийнинг «Горняк» жамоасини мағлуб этиб, тарихда иккинчи бор турнирнинг ярим финалига йўл олди.
Чорак финал серияси 4:1 ҳисобида Тошкент клуби фойдасига ҳал бўлди. Сериянинг финал баҳси «Ҳумо»нинг 5:1 ҳисобидаги ғалабаси билан якунланди.
Турнирнинг ярим финалида «Ҳумо» Уст-Каменогорскнинг «Торпедо» жамоасига қарши баҳс олиб боради. Сериянинг дастлабки ўйинлари 14 ва 16 март кунлари Уст-Каменогорскда, жавоб ўйинлари эса 20 ва 22 март кунлари Тошкентда бўлиб ўтади.
Ярим финалнинг яна бир иштирокчиси – «Арлан». У «Сарыарка»/«Алмата» учрашуви ғолибига қарши ўйнайди.
Эслатиб ўтамиз, 2022/2023 йилги мавсумда «Ҳумо» чорак финалда ҳам «Горняк»ни мағлуб этиб, якунда турнир финалига қадар етиб борган ва «Номад»га имкониятни бой берганди.
ℹ️ Ҳумо хоккей клуби 2018 йили ERIELL иштирокида ташкил этилган. Дастлабки мавсумдаёқ жамоа Ўзбекистон чемпионатининг гуруҳ босқичида ғолиб чиққан. 2019 йил баҳорида клуб ВХЛга қўшилади ва дублёр жамоа Қозоғистон чемпионатида «Ҳумо-2» номи билан эълон қилинди.
Мавсум якунида «Ҳумо-2» чемпионатда ўнинчи ўринни эгаллади. Асосий жамоа янада муваффақиятли кўринди ва Петров кубогининг чорак финалига чиқди. Бироқ, тошкентликлар коронавирус пандемияси туфайли Москванинг «Звезда» жамоасига қарши серияни якунлай олмаган.
2020 йил апрель ойида жамоа раҳбарияти COVID-19 пандемиясига қарши курашиш бўйича дунёнинг аксарият давлатларида кўрилаётган қатъий чеклов чоралари туфайли «Ҳумо» ВХЛдаги мавсумни, «Ҳумо-2» эса Қозоғистон чемпионатидаги мавсумни ўтказиб юборишини маълум қилганди. «Ҳумо» 2022 йилдан бери Қозоғистон чемпионатида иштирок этади. Бу вақт ичида тошкентликлар плей-офф финалига чиқди ва Қозоғистон кубогини қўлга киритди.
