Жомарт Ертаев. Kapital.kz сайти фотосурати
Қозоғистонлик собиқ банкир Жомарт Ертаев Bank RBK банкларидан миллиардлаб маблағни ўзлаштирганлик учун судланган бўлиб, жазони тўлиқ ўтаб бўлганидан сўнг озодликка чиқди. Бу ҳақдаги маълумотни «Курсив»га Жиноят-ижроия тизими қўмитасида (ЖИТҚ) тасдиқлашди.
Идора маълум қилишича, озодликка чиққанидан сўнг Ертаев устидан олти йил муддатга маъмурий назорат ўрнатилади.
2020 йил ноябрь ойида Ертаев Bank RBKдан 144 млрд тенге (322 млн доллар) миқдорида маблағни ўзлаштириш иши бўйича мол-мулкини мусодара қилиш билан 11 йилга озодликдан маҳрум этилганди. Тергов маълумотларига кўра, жиноятлар 2011 йилдан 2017 йилгача содир этилган. Таъкидланишича, Ертаев Bank RBK бошқарув раиси маслаҳатчиси бўлган пайтда сохта компания учун кредит олинишига ёрдам берган. Унинг ўзи эса кредитлар ажратилишига таъсир кўрсатмаганини айтган.
2017 йилда банк инқирозга дуч келганида, Ертаевдан қарзларни тўлаш ёки унга тегишли «Алмател Казахстан» («Алма-ТВ») телекоммуникация компанияси акцияларини бериш талаб қилинган. Кейинчалик унга нисбатан фирибгарлик бўйича жиноят иши қўзғатилган. Ертаевнинг ўзи эса шу йўл билан ундан бизнесини тортиб олишга уриниш бўлаётганини таъкидлаган.
Тадбиркор ҳибсга олингунга қадар сўнгги бир неча йилни Россияда ўтказган ва у ерда бир неча бор қўлга олинган. Дастлаб, 2018 йил май ойида Ертаев уй қамоғига олинган, аммо кейинчалик қочқин мақоми берилгач, озод қилинган. Кейинроқ Ертаев ушбу мақомдан маҳрум қилинди ва яна қўлга олиниб, такроран уй қамоғига жўнатилди, сўнгра СИЗОга ўтказилди. 2019 йил март ойида Ертаев Қозоғистонга экстрадиция қилиниб, ҳибсга олинди. Унга нисбатан ҳибсда ушлаб туриш эҳтиёт чораси бир неча бор узайтирилган.
2021 йил март ойида собиқ банкир яна бир бор қамоқ жазосига ҳукм қилинади — бу сафар сохта дон тилхатлари гарови эвазига банкларнинг кредит маблағларини ўзлаштириш иши бўйича. У 9 йилга озодликдан маҳрум этилади. Шу билан бирга, суд биринчи жиноят иши бўйича Ертаевга тайинланган жазони енгиллаштиради. Жазо муддатига унинг ҳибсда ўтказган вақти ҳам ҳисобга олинган.
Натижада собиқ банкир колонияда олти йилни ўтказади.
Қозоғистон ОАВлари Жомарт Ертаевни Қозоғистоннинг собиқ президенти Нурсултон Назарбоевнинг катта қизи Дариға Назарбоева билан боғлайди. У бир неча йил давомида Дариға Назарбоева ва унинг ўғли Нурали Алиевга тегишли бўлган «Алма-ТВ» МЧЖни бош директор сифатида бошқарган.
❗ 2025 йил кузида Ертаев амнистия доирасида муддатидан олдин шартли равишда озод қилингани ҳақида хабар берилган эди. Бироқ, кейинчалик шартли озод қилиш тўғрисидаги қарор бекор қилиниб, у яна колонияга қайтарилган.
