АҚШ президенти маъмурияти Chevron компанияси раҳбари Майк Виртнинг Қозоғистондаги нефть лойиҳалари хавфсизлиги юзасидан мурожаатидан сўнг Украинага Қора денгизда Россияга тегишли бўлмаган танкерларга зарба бериш мақсадга мувофиқ эмаслиги ҳақида огоҳлантирди. Бу ҳақда The Wall Street Journal музокаралар жараёнидан хабардор манбаларга таяниб хабар берди.
Нашр маълумотларига кўра, шу ҳафта Майк Вирт Трамп маъмурияти вакиллари билан Украина томонидан Қора денгизда амалга оширилган ҳужумларнинг Chevronнинг Қозоғистондаги нефть активларига таъсирини муҳокама қилган. Бунга Украина денгиз дронларининг Россиянинг Новороссийск порти яқинидаги тўртта нефть танкерига қилган ҳужумлари сабаб бўлган. Уларнинг бири Chevron томонидан чартер қилинган эди.
Мазкур порт орқали Каспий қувур консорциуми (КҚК) нефть қувури орқали нефть экспорт қилинади. Консорциумнинг маълум қисми Chevronга тегишли бўлиб, у дунёдаги кунлик нефть ишлаб чиқариш ҳажмининг тахминан 2 фоизини ташишни таъминлайди. Ҳужумдан кейин терминал орқали нефть юклаш чекланган ва бу Қозоғистонни нефть қазиб олиш ҳажмини қисқартиришга мажбур қилган.
The Wall Street Journal ёзишича, нефть компаниялари билан ўтказилган маслаҳатлашувлардан сўнг Вашингтон Киевга Россияга тегишли бўлмаган кемаларга зарба бериш мақсадга мувофиқ эмаслигини англатган. Америка расмийларидан бирининг сўзларига кўра, АҚШ маъмурияти Каспий қувур консорциумини Қозоғистон нефтини Европага етказиб беришдаги муҳим йўналиш деб ҳисоблайди. Бу йўналиш Европа давлатларининг Россия энергетика ресурсларига қарамлигини камайтиришга хизмат қилади.
Chevron КҚК акцияларининг 15 фоизига эгалик қилади. Шунингдек, компания Қозоғистондаги энг йирик Тенгиз нефть конининг 50 фоиз улушига эга бўлиб, мазкур кон Chevronнинг жаҳон бўйича умумий нефть қазиб чиқариш ҳажмининг тахминан 12 фоизини таъминлайди. Таҳлилчиларнинг баҳолашича, агар Новороссийск орқали нефть экспорт қилишдаги узилишлар давом этса, нефтни сақлаш қувватларининг чеклангани сабабли Chevron Тенгиз конида нефть қазиб олиш ҳажмини қисқартиришга мажбур бўлиши мумкуин.
