alma.plus сайти фотосурати
Қозоғистоннинг енг йирик кабел оператори Alma.plus Россиянинг «Биринчи» ва бошқа бир қатор каналлари трансляциясини тўхтатди.
Оператор сайтида хабар берилишича, 28 февраль ҳолатига кўра, «муаллифлик ҳуқуқи эгасининг вақтинчалик рухсатномаси муддати тугаши муносабати билан» «Биринчи каналнинг рақамли телеоиласи» пакетига киритилган каналлар кўрсатувлари тўхтатилди. Оператор ўчирилган каналлар ўрнига «муқобил каналлар рўйхатини тайёрлаганини» маълум қилди. Alma.plus томонидан чоп этилган инфографикада чап томонда трансляция жадвалида энди йўқ каналлар, ўнг томонда эса уларни алмаштирадиган каналлар кўрсатилган.
«Рақамли телеоила» — бу «Биринчи» канал томонидан 2005 йили ишга туширилган тематик каналлар пакетидир.
2025 йил декабрь ойида Alma.plus ўзининг трансляция жадвалига киритилиши мумкин бўлган ўзгаришларни эълон қилганди ва муаллифлик ҳуқуқи эгаси билан «ўзаро фойдали ва иккала томон учун ҳам мақбул бўлган» кейинги ҳамкорлик шартлари бўйича музокаралар олиб бораётганини таъкидлаганди. Январь ойида компания 28 февралгача вақтинчалик эфирга узатиш тўғрисида келишувга эришганини маълум қилди. «Бу муаллифлик ҳуқуқи эгасининг мулоқотга қайтиши туфайли мумкин бўлди», — деди Alma.plus вакиллари.
ORDA.kz нашри маълумотларига кўра, Биринчи канал, НТВ ва бошқа каналлар ҳам бошқа Қозоғистон операторларининг эфирга узатиш жадвалидан йўқолган. Уларнинг ўрнига фақат алоҳида обуна тўлови эвазига кўриш мумкин бўлган каналлар киритилган.
Эслатиб ўтамиз, 2022 йили «Beeline Казахстан» телекоммуникация компанияси «томошабинлар хоҳиш-истакларидаги ўзгаришлар» сабабли бир қатор Россия каналларини (шу жумладан «Биринчи» канални) эфирга узатишни тўхтатиш ниятини маълум қилганди. Бир ой ўтгач, компания ушбу қарорини бекор қилди.
