АҚШ Ғазначилик департаментининг Хорижий активларни назорат қилиш бошқармаси (OFAC) Ўзбекистон фуқароси Азизжон Мамашоевга нисбатан санкция жорий этди. АҚШ расмийларига кўра, у россиялик хакерлар билан алоқадорликда ва киберхавфсизлик жиноятларида гумон қилинмоқда. Санкциялар рўйхати янгиланганига оид пресс-релиз OFAC сайтига жойлаштирилган.
АҚШ расмийлари чет эл фуқаросининг шахсий маълумотлари, жумладан, паспорт маълумотларини тақдим этишган. Унга кўра, Мамашоев 1987 йилда туғилган ва битта мамлакат фуқаролигига эга — Ўзбекистон.
Юқорида тилга олинган Ўзбекистон фуқароси билан боғлиқ Advance Security Solutions (Advanced Security Solutions) компанияси ҳам SDN рўйхатига киритилган. OFAC сайтига кўра, компания 2025 йили БААнинг Дубай шаҳрида рўйхатдан ўтган. Бундан ташқари, Тошкент ҳам юридик манзил сифатида кўрсатилган.
Таъкидланишича, компания ҳужумкор киберхавфсизлик соҳасидаги фаолияти билан машҳур. Хусусан, у Қўшма Штатларда ишлаб чиқилган дастурий таъминотдаги заифликлар ҳақидаги маълумот учун мукофотлар таклиф қилувчи эксплоитлар (компьютер тизимларини бузиш воситалари) воситачиси сифатида ишлайди.
Ўзбекистон фуқароси билан бир қаторда, санкциялар россияликлар Олег Кучеров, Марина Васанович ва Сергей Зеленюкга нисбатан ҳам қўлланилган. Иккинчиси зарарли дастурлардан фойдаланган ҳолда АҚШ давлат идоралари ва тиббиёт муассасаларига киберҳужумлар уюштирганликда гумон қилинмоқда. Ҳужжатга кўра, Мамашоевни ҳам қўшган ҳолда, бу шахсларнинг барчаси Зеленюк ва унинг ташкилотига моддий ёки техник ёрдам кўрсатган.
Таъкидлаш лозим, SDN рўйхати АҚШ Молия вазирлигининг асосий қора рўйхати ҳисобланади. Унга қаттиқ чекловлар жорий этилган компаниялар ва шахслар киради. Санкция қўйилган субъектларнинг активлари музлатилган ва АҚШ фуқаролари ва корхоналарига рўйхатдагилар билан бизнес қилиш тақиқланган.
Ўтган йил ноябрь ойида OFAC Ўзбекистонда рўйхатдан ўтган Datavice компаниясини Россияга қарши санкциялар рўйхатига қўшгани ҳақида хабар қилганди. Америкаликларнинг фикрига кўра, мазкур компания Россия инфратузилмасини қўллаб-қувватлаш ёки кибержиноятчилик билан боғлиқ фаолиятда гумон қилинган.
