tvzvezda.ru сайти фотосурати
Яна икки Ўзбекистон фуқароси Россия армиясида хизматдан қайтганидан сўнг ўз юртида судланди. Бу ҳақда UzNews.uz Фарғона ва Навоий вилоятлари судлари ҳукмларига таяниб хабар берди.
Ёлланиш моддаси билан айбланган 49 ёшли фарғоналик Л.С.нинг иши жиноят ишлари бўйича Бешариқ тумани судида кўриб чиқилди. Иш материалларига кўра, у 2023 йил май ойида пул топиш учун Россияга кетган, аммо ишлаш рухсатномасини ололмаган. Шунда у ҳарбий комиссариатга мурожаат қилган, уни ҳарбий қисмга юборишган. У ерда ўзбекистонлик шартнома имзолаган ва 70 000 рубль олган. Шундан сўнг уни «Каменка» ҳарбий қисмига ўтказишган. У қўшимча 50 минг ва 170 000 рубль олган ва кейинчалик ойига 150 000 рублгача олган. Нашрнинг ёзишича, ўзбекистонлик эркакка «миграция картаси ва виза ҳужжатлари, шунингдек, 420 доллар ва 45 000 рубль миқдорида нақд пул берилган».
«Каменка»да унга оддий аскар унвони ва ҳарбий форма берилган, сўнг жанговар зонага жўнатилган. 2023 йил 27 июлдан бошлаб у Россия Қуролли Кучлари бўлинмаларида, жумладан, Луганск вилоятида жанговар операцияларда қатнашган. Ҳукмда у ўт очиб қўллаб-қувватлаш вазифаларини бажаргани ва жанговар тўқнашувларда қатнашгани қайд этилган.
Хизмат давомида эркак бир неча бор турли оғирликдаги жароҳатлар олган, жумладан, артиллерия ҳумида снаряд парчалари билан жароҳатланган. Даволанишдан сўнг у жанг зонасига қайтган. 2024 йил июнь ойида яна яраланганидан сўнг, Л.С. соғлиғи сабабли сафдан чиқарилган ва сентябрь ойида Ўзбекистонга қайтган.
Судда у ўз айбини тан олган ва пушаймон бўлганини, оиласининг, жумладан, рафиқаси, вояга етмаган фарзанди ва талаба ўғлининг ягона боқувчиси эканини айтган. Суд уни Жиноят кодексининг 154-моддаси («Ёлланиш») 1-қисми бўйича айбдор деб топди ва уч йилга озодликни чеклаш жазосига ҳукм қилди.
Жиноят ишлари бўйича Навоий вилояти суди Хатирчи туманида туғилған 28 ёшли С.С. иши бўйича ҳам шунга ўхшаш ҳукм чиқарди. Суд ҳужжатларига кўра, у 2021 йили Россияга ишлагани кетган ва 2025 йил апрель ойида Россия Қуролли Кучлари билан бир йиллик шартнома имзолаган.
Ўқотар қуроллар, портловчи моддалар ва дронлардан фойдаланиш бўйича ҳарбий тайёргарликни тугатгандан сўнг, С.С. Луганск вилоятига юборилган. У ерда йигит дрон ҳужуми пайтида жароҳат олган. Касалхонада даволангандан сўнг Ўзбекистонга қайтиб келган ва ҳуқуқни муҳофаза қилиш органларига мурожаат қилган. Экспертиза унинг ўртача оғир тан жароҳатлари олганини тасдиқлаган.
Суд мажлисида С.С. ўз айбини тан олган ва қийин ҳаёт шароитида қолганини айтган. Суд унинг ҳаракатларини Жиноят кодексининг 154-моддаси 1-қисми бўйича таснифлаган ва енгиллаштирувчи ҳолатларни — айбини тан олгани, пушаймон бўлгани ва кичик фарзанди борлигини ҳисобга олиб, Жиноят кодексининг 57-моддасини қўллаган, бу модда озодликдан маҳрум қилишни назарда тутмайди.
Суд С.С.га тўрт йилга озодликни чеклаш, яшаш жойидан рухсатсиз чиқиб кетишни тақиқлаш ва бир қатор қўшимча чекловларни тайинлаган.
ℹ️ «Фарғона» Ўзбекистонда ёлланиш моддаси бўйича жиноий ишлар қўзғатилаётгани ҳақида бир неча бор ёзган. Айрим судланганлар қамоқ жазосини олишган, айримлари озодликни чеклаш жазосига ҳукм қилинган. Шу йилнинг ноябрь ойида Давлат хавфсизлик хизмати 2022 йилдан бери Ўзбекистонда фуқароларнинг хориждаги қуролли можароларда иштирок этганига доир 338 та жиноий иш қўзғатилганини хабар қилди.
