Александр Вучич Ислом цивилизацияси маркази музейида. cisc.uz сайти фотосурати
Тошкентга расмий ташрифи давомида Сербия президенти Александр Вучич Ўзбекистондаги Ислом цивилизацияси марказига (ИЦМ) ташриф буюрди. Бу ҳақда Марказ матбуот хизмати хабар берди.
Вучич Марказга рафиқаси Тамара билан келди. Уларга экскурсия уюштирилди. Меҳмонларга музейнинг ноёб архитектураси ва беш залли кўргазмаси тақдим этилди ва уларга ИЦМнинг мақсад ва вазифалари ҳақида сўзлаб берилди.
Экскурсиядан сўнг Вучич тарихий ва маънавий меросни сақлаш ва намойиш этиш бўйича саъй-ҳаракатлар, албатта, муносиб натижалар беришини таъкидлади.
«Мен сизнинг Президентингизни ва мамлакатингизни ана шундай муҳташам мажмуа ишга тушаётгани билан табрикламоқчиман. Аввало бизга ушбу муҳташам марказ билан яқиндан танишиш имкони берилгани учун миннатдорлик билдираман. Бу йирик илмий-маърифий марказ нафақат хориждан келган меҳмонлар учун, балки ёш авлод вакиллари учун ҳам жуда катта аҳамиятга эга. Чунки улар бу марказ орқали ўзбек халқи маданияти ва тарихи билан таниша оладилар. Шунинг учун мен бугун жуда кўп нарсани ўргандим деб ўйлайман ва албатта бу ерга яна қайтаман. Мен сербиялик барча ватандошларимга шундай деган бўлардим: «Азизларим, мен жуда катта хато қилганман, чунки Ўзбекистонга илгари ҳеч қачон келмаганман. Илтимос, имкон қадар тезроқ бу юртни кўриш учун келинглар»», — деди Вучич.
Сербия президентининг Ўзбекистонга ташрифи Марказий Осиё республикаси раҳбари Шавкат Мирзиёевнинг таклифига биноан амалга оширилди. Учрашув якунида давлат раҳбарлари Қўшма декларацияни имзоладилар.
Шуни таъкидлаш лозим, Тошкентдаги Ислом цивилизацияси марказига ташриф буюриш юқори мартабали меҳмонлар учун яхши анъанага айланиб бормоқда. Аввалроқ Марказга Италия Бош вазири Жоржа Мелони ва Финляндия президенти Александр Стубб ташриф буюрди.
ℹ️ Ислом цивилизацияси маркази Хасти-Имом мажмуаси ёнида қурилмоқда. Иншоот қадимги меъморий обидалар шаклида бунёд этилмоқда. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Марказнинг энг асосий қисмида Қуръони карим зали бунёд этилмоқда. Бу ерда 460 ўринли анжуманлар зали ҳам қуриб битказилди. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
