8am.media сайти фотосурати
Афғонистоннинг 8am.media нашри хабар беришича, Тожикистон ва Афғонистон чегарасида тожик чегарачилари ва толиблар* ўртасида отишма содир бўлган. Ҳозирча ушбу маълумот расмий тасдиқланмаган ёки инкор этилмаган.
8am.media хабарига кўра, воқеа 25 октябрь куни Бадахшон вилоятининг Шаҳри-Бузург туманига қарашли чегарадош Давонг қишлоғида содир бўлган. Жанжал Хитой компаниялари иштирокида олтин қазиб олиш ишлари олиб борилаётган жойда Амударё сувини бошқа йўналишга буриш ҳаракатидан келиб чиққан.
Нашр манбаларига кўра, отишма натижасида қурбонлар бўлган, аммо ҳалок бўлганлар ва яраланганларнинг аниқ сони номаълум. Ҳодисадан кўп ўтмай, «Толибон»* ҳаракати раҳбарияти Бадахшоннинг янги ҳокими Исмоил Ғазнавий билан учрашув ўтказган, тафсилотлар ошкор қилинмаган.
ℹ️ Шаҳри-Бузург туманида толиблар ва тожик ҳарбийлари ўртасида илгари ҳам тўқнашувлар бўлганди. Норасмий хабарларга кўра, улардан бири шу йилнинг ёз ойи охирида содир бўлган. Можаро 24 август куни Хитой кончилик компаниялари ҳудудда ўз фаолиятини кенгайтирганидан ва Амударё дарёсининг бир қисми вайрон бўлганидан сўнг бошланган. Шунингдек, кончилик билан шуғулланаётган толиблар тожик чегарачиларининг қаттиқ қаршилигига дуч келган. Отишма бошланган, натижада бир «Толибон» жангари ўлдирилган ва яна тўрт киши яраланган.
Шундан сўнг Давонгда Афғонистон ва Тожикистон вакилларининг учрашуви кескин муҳитда ўтган. Томонлар бир-бирини қуролли жангариларга бошпана бериш ва уларни тайёрлашда айблаган. Афғонистон томонига кўра, Тожикистон толибларга қарши 350 нафар қуролли аскарни тайёрламоқда. Ўз навбатида, тожик томони Афғонистон жангариларга бошпана бераётганини таъкидлаган.
*Кўпгина мамлакатларда террорчи сифатида тан олинган ва тақиқланган ташкилот.
