Горан Стеванович. ТФФ матбуот хизмати фотосурати
Сербиялик мутахассис Горан Стеванович футбол бўйича Тожикистон миллий терма жамоасига бош мураббий этиб тайинланди. Бу ҳақда республика Футбол федерацияси матбуот хизмати хабар берди.
Стеванович сўнгги икки йил давомида жамоани бошқарган грузиялик мураббий Гела Шекиладзенинг ўрнини эгаллади.
«Фарғона» хабарига кўра, шартнома 2027 йилги Осиё Кубоги саралаш босқичи якунига қадар, узайтирилиши мумкин.
Стевановичга Қозоғистоннинг «Атирау» клубида тожикистонлик футболчилар Хусрав Тоиров ва Фатҳулло Олимзода билан бирга ишлаган Милан Павлович ва Радмило Азанияцлар ёрдам беришади.
«Фарғона» маълумотига кўра, терма жамоа бош мураббийлигига номзодлар рўйхатида Тожикистон терма жамоасининг собиқ устози Петар Сегрт, Туркманистон терма жамоаси собиқ бош мураббийи хорватиялик Анте Мише, германиялик Вилли Кронхардт ва бир қанча россиялик мутахассислар бўлган.
Қизиғи шундаки, Горан Стеванович ўтган асрнинг 80-йилларии Белграднинг «Партизан» клубида бир неча ўн йиллар ўтиб Ўзбекистон миллий терма жамоасини бошқарган Югославия юлдузлари Предраг Миятович, Златко Захович ва Сречко Катанец билан бирга ўйнаган. Кейинчалик, 1990-йиллари Стеванович қисқа вақт давомида Қозоғистон терма жамоасининг бўлажак мураббийи Станимир Стоилов билан бирга Португалия чемпионатида «Кампомайоренсе»да ўйнади.
Мураббий сифатида Стеванович «Партизан» билан ишлаган, у билан Сербия чемпионлигини қўлга киритган, Гана терма жамоаси билан Африка Миллатлар Кубогининг ярим финалига чиққан, Сербия ёшлар терма жамоаси, шунингдек, Греция ва Хитой терма жамоалари билан бирга ишлаган. Унинг сўнгги мураббийлик лавозими Сербия иккинчи дивизионидаги «Напредак» клуби бўлган.
Эслатиб ўтамиз, Тожикистон терма жамоаси икки турдан сўнг Осиё Кубоги саралаш гуруҳида пешқадамлик қилмоқда. Уларнинг навбатдаги саралаш ўйинлари 9 ва 14 октябрь кунлари Мальдив ороллари термасига қарши ўтказилади.
