e-cis.info сайти фотосурати
Ўзбекистон Евроосиё тараққиёт банки (ЕТБ) акцияларини сотиб олиш учун 168,4 миллион доллардан ортиқ маблағ сарфлайди. Бу ҳақда президентнинг 16 сентябрда имзоланган ЕТБга аъзолар таркибига қўшилиш чора-тадбирлари тўғрисидаги қарорида айтилган.
Ҳужжатда қайд этилишича, ЕТБнинг Ўзбекистон учун устав капитали ҳар бири 1000 доллардан номинал қилинган 777 777 та акцияни ўз ичига олади. Жами акциялар сонидан 168 411 дона (21,7 фоиз) тўлиқ тўланган бўлса, қолган 609 366 дона (78,3 фоиз) акциялар банк талабига биноан тўланиши лозим.
Акцияларни сотиб олиш учун маблағлар республика бюджетидан ажратилади: 2025 йили 10 миллион доллар, кейинги икки йилда эса ҳар йили 79,2 миллион доллар миқдорида молиялаштириш кўзда тутилган. Қолган маблағлар доимий асосда Давлат бюджети параметрларига киритилади.
Инвестициялар, саноат ва савдо вазирлиги ЕТБ улушини сотиб олиш бўйича келишувни амалга ошириш учун масъул, молиялаштириш эса Иқтисодиёт ва молия вазирлиги томонидан амалга оширилади.
ℹ️ Евроосиё тараққиёт банки 2006 йилдан буён Евроосиё маконида инвестиция фаолиятини амалга ошириб келаётган кўп томонлама банк бўлиб, 2025 йилга келиб ЕТБ портфели 16,5 миллиард долларлик 305 та лойиҳани ўз ичига олади. Асосий улуш транспорт инфратузилмаси, рақамли тизимлар, «яшил» энергия, қишлоқ хўжалиги, саноат ва машинасозлик соҳаларидаги дастурлардан иборат.
Олтита давлат ЕТБ аъзоси: Арманистон, Беларусь, Қозоғистон, Қирғизистон, Россия, Тожикистон. Ўзбекистон банкка аъзо бўлиш истагини 2022 йил 25 февралда маълум қилган ва мамлакат президенти Шавкат Мирзиёев 2025 йил апрелида тегишли қонунни имзолаган эди.
