Ўзбекистон президенти матбуот хизмати фотосурати
Президент Шавкат Мирзиёев Тошкент вилоятининг Бўстонлиқ туманига ташриф буюриб, «Ренессанс» болалар соғломлаштириш оромгоҳида яратилган шароитлар билан танишди. Айнан шу ерда иқтидорли ўқувчилар Американинг Печак лигаси университетларига ўқишга кириш учун ўқув курсларини ўтамоқда, деб хабар беради Марказий Осиё республикаси раҳбари матбуот хизмати.
Қайд этилишича, давлат раҳбарининг ташаббусига мувофиқ, ёшларни Американинг Печак лигаси (The Ivy League) университетларига тайёрлаш йўлга қўйилмоқда. Бунинг учун миллий дастур қабул қилинди. Жорий йил дастлаб 1,5 минг нафар ўқувчи саралаб олинди. Уларга Президент ва ихтисослашган мактаблардан 208 нафар маслаҳатчи бириктирилди.
Мазкур «Ренессанс» оромгоҳи ушбу тизимнинг бир қисми. Бу ерда ёшлар йил давомида 3 ҳафталик интенсив ўқув курсларда ўқитилади. Яхши натижа кўрсатган 40 нафари Печак лигаси университетларига тажриба алмашиш учун юборилади.
Оромгоҳ 500 га яқин ўқувчини қабул қилиш қувватига эга. Маъмурият, ўқув бинолари ва ётоқхонада замонавий шароитлар яратилган. Меҳмонхона, ошхона ҳамда автотураргоҳлар ташриф буюрувчилар учун қўшимча қулайлик саналади.
Ёзда ўтказилган семинарларда фан олимпиадалари ғолиблари, хорижий тил сертификатига эга ёшлар, ижтимоий ҳимояга муҳтож оила фарзандлари иштирок этди. Бу тенг имкониятлардан фойдаланган ўғил-қизлар билимини ошириб, келажагига мустаҳкам замин яратди. Илгари оромгоҳларга дам олиш ва кўнгилочар маскан сифатида қаралган. Энди «Ренессанс» ўқувчиларнинг таълим, маънавият ва инновация майдонига айланди.
Президент оромгоҳ хоналаридаги шароитларни, ёшларнинг ихтироларини кўздан кечирди. STEAM хоналари, самолёт бошқаруви симулятори, табиий фанлар лабораториялари болаларнинг қизиқишларини амалий кўникмаларга айлантиради.
Бундан ташқари, Мирзиёев «Янги Ўзбекистон» университети раҳбарияти ва битирувчилари билан учрашди.
«Ўзбекистон ёшларининг салоҳияти, ғайрат-шижоати, интилиши кучли. Биз давлат бўлиб, миллат бўлиб, сифатли таълимни таъминласак, фарзандларимизга ҳеч ким бас келолмайди, улар ҳамма соҳада етакчи бўлади», — деди республика раҳбари.
Бугунги кунда Ўзбекистонда таълим ва ёшлар сиёсати устувор йўналиш ҳисобланади. Шу боис таълим масканлари қурилиб, жиҳозланмоқда, ўсмирларнинг ўз қобилиятига мос равишда ўзини намоён этиши учун имконият яратилмоқда. Кейинги йилларда 14 та Президент мактаби, 201 та ихтисослаштирилган мактаб, 2 та спорт мактаби, 9 та ижод мактаби очилди. Улардаги ўқитиш ва баҳолаш тизими 1 минг 500 та умумтаълим мактабида ҳам жорий этилди.
Хорижда ўқишни давом эттиришни режалаштираётган иқтидорли талабаларни тайёрлаш бўйича фаол ишлар олиб борилмоқда. Натижада республикада фан олимпиадалари маркази ташкил этилди ва халқаро мактаб очилди.
ℹ️ «Печак лигаси» — Америка Қўшма Штатларининг шимоли-шарқида жойлашган саккизта хусусий Америка олий таълим муассасаси уюшмасидир. Ассоциацияга қуйидаги университетлар киради: Браун, Колумбия, Корнелл, Дартмут, Гарвард, Принстон, Пенсилвания ва Йел. Бу университетлар ўзининг юксак нуфузи ва таълим сифати билан ажралиб туради.
