АҚШ президенти Дональд Трамп 2021 йили Кобул аэропортида 13 нафар америкалик ҳарбий ва камида 170 тинч афғон фуқаросининг ўлимига сабаб бўлган портлашга алоқадор «асосий террорчи» қўлга олинганини маълум қилди. Бу ҳақда CNN хабар берди.
«Бугун кечқурун шуни мамнуният билан эълон қиламанки, биз мазкур ваҳшийлик учун жавобгар бўлган асосий террорчини қўлга олдик ва у ҳозир Американинг адолат қиличига дучор бўлиш учун бу ерга йўл олган», — деди Трамп АҚШ Конгресси Вакиллар палатаси ва Сенатида мамлакатдаги вазият, ички ва ташқи сиёсатнинг устувор йўналишларига бағишланган нутқида.
Террорчи Покистонда қўлга олинган, расмийлар уни қўлга олишда Марказий разведка бошқармаси разведка маълумотларига таянган. Трамп Покистонга «ушбу монстрни қўлга олишда ёрдам бергани учун» миннатдорчилик билдирди.
Ўз навбатида, Покистон Бош вазири Шаҳбоз Шариф Трампга «Покистоннинг Афғонистондаги терроризмга қарши курашдаги ролини юқори баҳолагани ва қўллаб-қувватлагани учун» миннатдорчилик билдирди. Унинг сўзларига кўра, хавфсизлик кучлари «Покистон-Афғонистон чегараси ҳудудида муваффақиятли ўтказилган операция натижасида» Афғонистон фуқароси Шарифуллоҳни қўлга олган. «Биз минтақавий тинчлик ва барқарорликни таъминлаш учун Қўшма Штатлар билан яқин ҳамкорликни давом эттирамиз», — дея қўшимча қилган Шариф.
Толиблар* расмий вакили Забиҳуллоҳ Мужоҳид АҚШ президенти ва Покистон Бош вазирининг баёнотларига жавоб қайтарди.
«Мазкур ҳужум ИШИД* томонидан амалга оширилган. ИШИД жангариларининг Покистонда қўлга олингани уларнинг у ерда бошпана топиб, ўз базаларини ташкил этганини англатади. Бу савол Афғонистонга тегишли эмас; ушбу хавфли гуруҳлар баъзи мамлакатларда бошпана топган ва ўқув лагерларига эга», — дейди Мужоҳид 5 март куни аудиомурожаатида.
Вазиятдан хабардор CNN телеканалига кўра, ҳибсга олинган Муҳаммад Шарифуллоҳ АҚШга олиб келинади ва унга терроризмга моддий ёрдам кўрсатиш ва унга тил бириктириш айби қўйилади.
Якшанба куни у ФҚБ ходимлари томонидан сўроқ қилинган. Шарифуллоҳ 2016 йили ИШИД-Хуросон* томонидан ёлланганини ва бир неча ҳалокатли ҳужумларни режалаштиришда иштирок этганини тан олган. Айблов хулосасида унинг бошқа ҳужумлар, жумладан, Кобулдаги элчихона қўриқчиларига ҳужум ва Москвадаги тунги клубга уюштирилган ҳужумга алоқадорлиги кўрсатилган.
👉 Шарифуллоҳ 2019 йилдан бери қамоқда бўлган ва у ердан Кобул аэропортида содир этилган терактдан икки ҳафта олдин озодликка чиққан. Озод қилинганидан сўнг ИШИД аъзолари у билан боғланиб, ҳужумга тайёргарлик кўришда ёрдам беришини сўрашган. Шарифуллоҳга аэропортга борадиган йўлни ўрганиш, назорат-ўтказиш пунктлари ва юзага келиши мумкин бўлган хавфларни текшириш вазифаси юкланган. У ИШИД аъзоларига маршрут ҳужумчи учун хавфсиз эканини айтганидан сўнг унга аэропортни тарк этиш буйруғи берилган. Кейинчалик у теракт ҳақида билган ва қамоқда бўлганида таниш бўлган жиноятчини таниб қолган.
ℹ️ Террор ҳужуми 2021 йил 26 август куни содир бўлган. Чет элликлар ва хорижий кучлар билан ҳамкорлик қилган афғонларни тартибсиз эвакуация қилиш чоғида Кобул аэропортининг шарқий дарвозаси яқинида ИШИДнинг худкуш ҳужумчиси ўзини портлатиб юборган. Бу пайт у ерда юзлаб афғонлар тўпланиб, эвакуация рейсларидан бирига чиқишга ҳаракат қилаётган ва ўнлаб америкалик ҳарбийлар тартибни сақлаб турган бўлган. Бу ҳолат теракт қурбонлари сонининг кўплигини англатади. 2023 йил апрель ойида ушбу ҳужум ташкилотчиси йўқ қилингани ҳақида хабар берилган эди.
*РФ ва кўпгина давлатларда террорчи сифатидан тан олинган ва тақиқланган ташкилот (Россия қонунчилиги талаби бўйича изоҳлаб ўтамиз).
