Туннелда ёниб кетган Nissan Qashqai . Москва бўйича ФВВ ББ фотосурати
Қирғизистонлик таксичи Москва шаҳрининг Норорижское шоссесида жойлашган туннелда ёниб кетаётган машинадаги одамларни қутқариб қолган. Бу ҳақда 24 июнь куни Vesti.Kg нашри хабар қилади.
Таксичининг сўзларига кўра, у 23 июнь куни мижозини олиб йўлдаги туннел бўйича ҳаракатлана бошлайди. Бирдан у олдинда тутаб кетаётган машинани кўради. Таксичи мижози билан машинага яқинлашади ва машина ичида болали оилани кўради. Бошқа ҳайдовчилар автомобилнинг портлаб кетишидан қўрқиб, бу ердан қоча бошлайдилар. Мигрант оилани ўз машинасига ўтказиб, тўрт километрли туннелдан чиқишга ҳаракат қилади. Улар йўлга тушиши билан ортдаги машина портлагани эшитилади. Туннелдан эсон-омон чиқиб олган таксичи ўша оилани қолдириб, ўз ишини давом эттиради. Машина нима сабабдан ёниб кетганини у билмайди. Таксичилик ортидан кун кўраётган мигрантнинг хотини бўлиб ўтган воқеани тасвирга олади ва ижтимоий тармоққа юклайди. Тасвирда ёнаётган машинадаги қизалоқ рюкзаги қолиб кетганини айтиб бақираётгани, таксичи йигит машина тез орада портлаши, шунинг учун тезроқ бу ердан кетиш кераклигини тушунтираётгани эшитилади.
Autonews.ru маълумотига кўра, туннелда машина ёниб кетгани сабаб Москва марказига элтувчи йўлда тирбандлик пайдо бўлган, кейинчалик ушбу кўчадаги қатнов мутлоқ тўхтатилган. Ёниб кетган машина олдига ўт ўчириш, тез ёрдам ва полиция машиналари етиб келади. Ёнғиндан ҳеч ким жабр кўрмаган, машинанинг нима сабабдан ёниб кетгани номаълум.
